सुपरसॉनिक क्षेपणास्त्र 'ब्रह्मोस' फिलिपिन्स नौदलाला विकणार, 375 दशलक्ष डॉलरचा करार

नवी दिल्ली -

बराच काळ शस्त्रास्त्र आयातदार देश असलेला भारत आता शस्त्रास्त्रांचा मोठा निर्यातदार देश बनणार आहे. या दिशेने फिलीपिन्ससोबत मोठा करार करण्यात आला आहे. भारत ब्रह्मोस सुपरसॉनिक क्षेपणास्त्र फिलिपिन्सच्या नौदलासाठी विकणार आहे. ब्रह्मोस क्षेपणास्त्रांच्या निर्यातीची ही पहिली परदेशी ऑर्डर आहे.

ब्रह्मोस सुपरसॉनिक क्षेपणास्त्र ध्वनीच्या तिप्पट म्हणजेच ताशी ४३२१ किलोमीटर वेगाने मारा करण्यास सक्षम आहे. ब्रह्मोस क्षेपणास्त्रांच्या खरेदीसाठी फिलीपिन्सने भारतासोबत 375.5 दशलक्ष (रु. 2,812 कोटी) डॉलरचा करार केला आहे. सरकारी अधिकाऱ्यांनी शुक्रवारी ही माहिती दिली. दोन्ही देशांच्या अधिकाऱ्यांनी या करारावर स्वाक्षऱ्या केल्या. अतुल डी राणे, सीईओ, ब्रह्मोस एरोस्पेस इंडिया, संजीव जोशी, उप सीईओ, लेफ्टनंट. कर्नल आर. नेगी, प्रवीण पाठक उपस्थित होते.

चीनच्या आक्रमक वृत्तीला तोंड देत असलेल्या फिलीपिन्सने भारतासोबत जगातील सर्वात वेगवान सुपरसॉनिक अँटी-शिप क्रूझ क्षेपणास्त्र ब्रह्मोस खरेदी करण्याचा करार करून चीनला धक्का दिला आहे. सूत्रांचे म्हणणे आहे की डीआरडीओ (संरक्षण संशोधन आणि विकास संस्था) आणि ब्रह्मोस एरोस्पेस हे क्षेपणास्त्र मित्र देशांना निर्यात करण्यासाठी पूर्ण प्रयत्न करत आहेत. डीआरडीओने नुकताच मेड इन इंडिया रडारसाठी अमेरिकेसोबत करार केला होता. इतर काही देशांशीही वाटाघाटी अंतिम टप्प्यात असल्याने भारताला लवकरच इतर मित्र देशांकडूनही क्षेपणास्त्र प्रणालीसाठी ऑर्डर मिळण्याची अपेक्षा आहे. या क्षेपणास्त्राची क्षमता वाढली असून ते अनेक अत्याधुनिक वैशिष्ट्यांनी सज्ज झाले आहे. चीनचा दुसरा शेजारी देश व्हिएतनामही भारताकडून ही क्षेपणास्त्र प्रणाली खरेदी करू शकतो.

चीनला धक्का

फिलिपाइन्सला डोळे दाखवणाऱ्या चीनला या कराराचा मोठा झटका बसला आहे. वास्तविक, दक्षिण चीन समुद्रात फिलीपिन्सच्या अधिकारक्षेत्रावरून चीनसोबत वाद सुरू आहे. अहवालानुसार, अशा परिस्थितीत फिलिपिन्स आपल्या किनारी भागात ब्रह्मोस क्षेपणास्त्र तैनात करू शकते.