कोल्हापुरच्या चंदगडमधून एमडी ड्रग्सचा कोट्यवधीचा साठा जप्त !

कोल्हापूर -

मुंबई ड्रग्स प्रकरणानंतर राज्यात मोठ्या प्रमाणात ड्रग्स रॅकेट सुरु असल्याचं समोर येत आहे. आता तर थेट कोल्हापुरातल्या चंदगड तालुक्यात एमडी ड्रग्स रॅकेटचे धारेदोरे मिळाले आहेत. मुंबई पोलिसांनी कोल्हापुरातल्या चंदगड येथील ढोलगरवाडी गावातून 72 तासाच्या चौकशीनंतर एकाला अटक करण्यात आलीय. या प्रकरणात एका हाय प्रोफाईल वकिलाचा समावेश असल्याचं सांगितलं जातंय. या ठिकाणी छापा मारुन कोट्यवधी रुपयांचा माल मुंबई अंमली पदार्थ विरोधी पथकाकडून जप्त करण्यात आला.

मुंबईतील अंमली पदार्थ विरोधी पथकाकडून ढोलगरवाडीतल्या एका फार्महाऊसवर सलग तीन दिवस तपास करण्यात आलाय. या तपासानंतर एका मोठ्या वकिलाच्या अडचणीत वाढ होण्याची शक्यता आहे. एका फार्महाऊसवर एमडी ड्रग्स बनवण्याचा कारखाना सुरु होता. मुंबई एका महिला ड्रग्स पेडलरला अटक केल्यानंतर कोल्हापुरातल्या चंदगडमध्ये अंमली पदार्थ विरोधी पथकाकडून छापा टाकण्यात आला. कोल्हापुरातील अटक केलेल्या संशयिताला मुंबईला नेल्याची माहिती मिळतेय.