भाजपा खासदार गिरीश बापट यांचं निधन

पुणे - भाजपाचे पुण्यातील खासदार गिरीश बापट यांचं निधन झालं आहे. ते ७२ वर्षांचे होते. प्रकृती अस्वास्थ्यामुळे त्यांच्यावर पुण्यातील रुग्णालयात उपचार सुरू होते. मात्र, त्यांची प्राणज्योत मालवल्याची माहिती समोर आली आहे. त्यांच्यावर संध्याकाळी सात वाजता वैकुंठ स्मशानभूमीत अंत्यसंस्कार केले जाणार आहे, अशी माहिती जगदीश मुळीक यांनी दिली आहे.

1950 मध्ये तळेगाव दाभाडे येथे त्यांचा जन्म झाला. ते आरएसएसचे स्वयंसेवक होते. 1973 मध्ये पिंपरीतील टेल्को मध्ये ते कामास लागले. तेथे त्यांनी कामगार नेता म्हणूनही काम केले. पुढे त्यांचा राजकीय क्षेत्रात प्रवेश झाला.

पुण्यातील कसबा पेठेतून ते सलग तीन वेळा नगरसेवक म्हणून निवडून आले. त्यांनी कसबा पेठ विधानसभा मतदारसंघाची पोट निवडणूकही लढवली होती. मात्र त्यात त्यांचा पराभव झाला होता. नंतर मात्र कसबा पेठ विधानसभा मतदारसंघातून सलग पाच वेळा भाजपचे आमदार म्हणून निवडून आले. २०१९ मध्ये ते पुण्याचे खासदार म्हणून निवडून आले.

(क्रमशः:)