ठाण्यात राष्ट्रवादीला खिंडार; 5 नगरसेवक शिंदे गटात प्रवेश करणार

ठाणे (प्रबोधन न्यूज) - ठाणे महापालिका निवडणुकीच्या पार्श्वभूमीवर राष्ट्रवादी काँग्रेसला खिंडार पडणार अशी चर्चा गेल्या काही दिवसांपासून राजकीय वर्तुळात सुरू होती. या चर्चेवर अखेर शिक्कामोर्तब झालं आहे. हा जितेंद्र आव्हाड यांना मोठा धक्का मानला जात आहे. गेल्या काही दिवसांपासून राष्ट्रवादी काँग्रेसचे काही माजी नगरसेवक आणि मुख्यमंत्री एकनाथ शिंदे यांच्यात जवळीक वाढली होती. त्यानंतर आता हनमंत जगदाळे यांच्यासह 5 माजी नगरसेवक बाळासाहेबांची शिवसेना पक्षात प्रवेश करणार आहेत. 12 फेब्रुवारी रोजी राष्ट्रवादीचे माजी नगरसेवक शिंदे गटात प्रवेश करणार आहेत.

जगदाळे यांनी एका निवदेनात म्हटलं आहे की, "गेल्या अनेक वर्षांपासून प्रभागाचे नेतृत्व करीत असताना आपण मला कायम साथ दिली. मी जे पुढील पाऊल उचलणार आहे, लोकमान्य, शास्त्री, सहकार नगर या विभागाचा क्लस्टर योजनेच्या माध्यमातून सर्वांगीण विकास करून घेण्यास मी कटिबद्ध आहे."

"रविवारी (12 फेब्रुवारी) सायंकाळी 6 वाजता कोरस हॉस्पिटल रोड लक्ष्मी पार्क जवळ मुख्यमंत्री एकनाथ शिंदे यांच्या उपस्थितीत बाळासाहेबांची शिवसेना पक्षात प्रवेश करणार आहे", असं हणमंत जगदाळे यांनी म्हटलं आहे.

एकनाथ शिंदे आणि राष्ट्रवादी काँग्रेसचे काही माजी नगरसेवक यांच्यात वाढत्या जवळकीमुळेच 12 ते 15 माजी नगरसेवक शिंदे गटात जाण्याच्या चर्चेनं डोकं वर काढलं होतं. दरम्यान, 5 माजी नगरसेवकांनी शिंदे गटात जाण्याचा निर्णय घेतला असून, आणखी काही माजी नगरसेवक शिंदे गटात जाऊ शकतात, अशीही चर्चा आहे. यामुळे ठाण्यातील राष्ट्रवादीचे आमदार जितेंद्र आव्हाड यांच्या गडाला हादरे बसण्यास सुरुवात झाली आहे असे मानले जात आहे.