विद्यापीठ चौकात मेट्रोच्या कामासाठी वाहतुकीत बदल

पुणे (प्रबोधन न्यूज) - सावित्रीबाई फुले पुणे विद्यापीठ चौकामध्ये मेट्रोकडून उड्डाणपुलाच्या कामाचे नियोजन असून, मेट्रोकडून अतिरिक्त बॅरिकेडिंग केले जाणार आहे. त्यामुळे या चौकात वाहतूक कोंडी होऊ नये; म्हणून वाहतूक पोलिसांनी विद्यापीठ चौक व गणेश खिंड रस्ता परिसरात वाहतुकीत बदलाचे नियोजन केले आहे. सावित्रीबाई फुले पुणे विद्यापीठ चौक, बाणेर रस्ता, पाषाण रस्ता, गणेश खिंड आणि सेनापती बापट रस्ता परिसरात प्रायोगिक बदल करण्यात आला आहे. येत्या दोन ते तीन दिवसांपासून हा बदल प्रायोगिक तत्त्वावर लागू केला जाणार आहे. त्यामुळे नागरिकांनी नियमांचे पालन करावे, असे आवाहन वाहतूक पोलिसांनी केले आहे.

बाणेर व औंध रस्त्याने विद्यापीठ चौकात येणारी वाहने विना सिग्नल शिवाजीनगरकडे डाव्या लेनने जाणे प्रस्तावित आहे. विद्यापीठ चौक येथे पादचाऱ्यांना रस्ता ओलांडण्यासाठी वेळ देण्यात येत आहे.
गणेशखिंड रस्त्याने सेनापती बापट रस्त्याकडे जाण्यासाठी यापूर्वी कॉसमॉस बँक येथे ‘यू टर्न’ देण्यात आला होता. तो ‘यू-टर्न’ बंद करून सेनापती बापट रस्ता जंक्शन येथून उजवीकडे वळण्यास परवानगी देण्यात येणार आहे.
सेनापती बापट रस्त्याने (चतुःश्रृंगी मंदिर) येथून विद्यापीठ चौकाकडे येणारी सर्व वाहतूक सेनापती बापट रस्ता जंक्शन येथून डावीकडे वळून सरळ पाषाण रस्त्याकडे वळविण्यात येणार आहे.

औंधकडे जाण्यासाठी पर्यायी मार्ग

पर्यायी वर्तुळाकार मार्ग १ : गणेशखिंड व सेनापती बापट रस्त्याकडून पुणे विद्यापीठ, चतुःश्रृंगी पोलिस ठाणे, कस्तुरबा गांधी वसाहतीकडे जाणाऱ्या वाहनांनी पाषाण रस्त्याने सिंहगड गेट (पुणे ग्रामीण पोलिस मुख्यालय) येथून उजवीकडे वळून बाणेर रस्त्याने उजवीकडे वळून सरळ विद्यापीठ चौकातून डावीकडे वळून औंधकडे जावे.
पर्यायी मार्ग २ : पाषाण रस्त्याने अभिमानश्री सोसायटी, पाषाण रस्ता जंक्शन, उजवीकडे वळून अभिमानश्री सोसायटी, बाणेर रस्ता जंक्शन उजवीकडे वळून बाणेर रस्त्याने उजवीकडे वळून सरळ विद्यापीठ चौकातून डावीकडे वळून औंध कडे जाता येईल.
पर्यायी मार्ग ३ : सेनापती बापट रस्त्याकडून औंधकडे जाणाऱ्या वाहनांनी पाषाण रस्त्याने अभिमानश्री सोसायटी, पाषाण रस्ता जंक्शन, उजवीकडे वळून अभिमानश्री सोसायटी. बाणेर रस्ता जंक्शन डावीकडे वळून बाणेर फाटा, उजवीकडे वळून सर्जा हॉटेल कॉर्नर डावीकडे वळून क्रोमा मॉल रस्त्याने किंवा बाणेर फाटा उजवीकडे वळून आय. टी. आय. रस्ताने परिहार चौक मार्गे इच्छितस्थळी जावे.

राजीव गांधी पुलाकडून गणेशखिंड रस्त्याकडे येणाऱ्यांना पर्यायी मार्ग

ब्रेमेन चौकातून डावीकडे वळून स्पायसर कॉलेज रस्ता, आंबेडकर चौक, साई चौक, उजवीकडे वळून खडकी पोस्टे रेल्वे अंडरपास डावीकडे वळून चर्चे चौक, जुना पुणे-मुंबई महामार्गाचा वापर करता येईल.
पुणे स्टेशन, कोरेगाव पार्क, मुंढव्याकडून औंधकडे जाणाऱ्या वाहनांनी इंजिनीअरिंग कॉलेज उड्डाणपुलावरून, वाकडेवाडी, पोल्ट्री फार्म चौक, चर्च चौक, डावीकडे वळून खडकी पोलिस ठाणे अंडरपास, डावीकडे वळून मरिआई मंदिर, उजवीकडे वळून गोगादेव चौक, उजवीकडे वळून जे टाइप (फुटबॉल ग्राउंड), उजवीकडे वळून साई चौक, डावीकडे वळून आंबेडकर चौक, स्पायसर चौक, ब्रेमेन चौकातून इच्छितस्थळी जावे.

पुणे विद्यापीठ चौकात मेट्रोकडून काम सुरू करण्यात येणार आहे. वाहतूक कोंडी होऊ नये; म्हणून परिसरातील वाहतूक बदल करण्याचे काम सुरू आहे. प्रायोगिक तत्त्वावर दोन ते तीन दिवसांत बदलानुसार वाहतूक सुरू केली जाईल. असे पोलीस उपायुक्त वाहतूक शाखेचे विजय मगर यांनी कळविले आहे.