विकास पाठक उर्फ हिंदुस्थानी भाऊला अटक; युट्युबवर विद्यार्थ्यांना भडकावल्याचा आरोप, इन्स्टाग्रामवर व्हिडिओ अपलोड

मुंबई -

यूट्यूब व्हिडीओजच्या माध्यमातून सेलिब्रिटी बनलेला विकास पाठक उर्फ हिंदुस्थानी भाऊ सध्या अडचणीत आहे. त्याच्यावर विद्यार्थ्यांना भडकावल्याचा आरोप आहे, त्यानंतर धारावी पोलिसांनी आयपीसी कलम, महाराष्ट्र पोलीस कायदा, आपत्ती व्यवस्थापन कायदा आणि इतर अंतर्गत गुन्हा नोंदवून त्याला अटक केली आहे. याप्रकरणी पोलिसांनी इकरार खान वकार खान नावाच्या आणखी एकाला अटक केली आहे.

हिंदुस्थानी भाऊने इंस्टाग्रामवर एक व्हिडिओ अपलोड केला आहे. या व्हिडिओच्या माध्यमातून विद्यार्थ्यांना आंदोलनासाठी चिथावणी देण्यात आली, त्यानंतर सोमवारी मुंबईतील धारावीमध्ये अनेक विद्यार्थ्यांनी निदर्शने केली. कोविड-19 च्या संकटात 10वी आणि 12वीच्या परीक्षा ऑनलाइन कराव्यात, अशी या विद्यार्थ्यांची मागणी आहे.

बिग बॉस 13 चा स्पर्धक असलेला विकास पाठक उर्फ हिंदुस्थानी भाऊ त्याच्या व्हायरल व्हिडिओंमुळे चर्चेचा विषय राहिला आहे. 'बिग बॉस'मध्ये आल्यानंतर तो अधिकच चर्चेत राहिला होता. फार कमी लोकांना माहीत असेल की हिंदुस्थानी भाऊ YouTuber होण्यापूर्वी पत्रकार होता. टाईम्स ऑफ इंडिया या इंग्रजी वेबसाईटने दिलेल्या वृत्तानुसार हिंदुस्थानी भाऊ मुंबईतील एका स्थानिक वृत्तपत्रात क्राइम रिपोर्टर म्हणून कार्यरत होता. गुन्हेगारीविषयक पत्रकारितेसाठी २०११ मध्ये त्याला सर्वोत्कृष्ट चीफ क्राइम रिपोर्टरचा किताबही मिळाला आहे.

विकास पाठक याच्यावर यापूर्वीही कारवाई करण्यात आली आहे. मुलांच्या परीक्षा रद्द कराव्यात आणि शाळेची फी माफ करावी या मागणीसाठी तो मुंबईतील दादर शिवाजी पार्कवर निदर्शने करत होता. यानंतर त्याला कोरोनाचे नियम न पाळल्याबद्दल अटक करण्यात आली. पुन्हा एकदा तो अडचणीत आला आहे.