क्रौर्याची परिसीमा; चार दिवसांच्या बाळाला ताम्हिणी घाटाच्या दरीत बापानेच फेकले
प्रबोधन वृत्तसेवा 
पुणे, दि. १२ - चिडलेल्या बापाने चार दिवसाच्या मुलीचा गळा दाबून खून केला व ताम्हिणी घाटातील दरीत फेकून दिल्याची घटना नुकतीच समोर आली आहे. विशेष म्हणजे बायकोच्या कुशीतील बाळ हिसकावून घेऊन त्याने हा प्रकार केला. अचानक झालेल्या या प्रकाराने बाळाची आई हादरून गेली होती.
मंगल सचिन चव्हाण (वय २७, रा. गोडांबेवाडी घोटावडे, मुळशी, पुणे) यांनी पौंड पोलीस ठाण्यात याबाबत तक्रार दिली आहे. मंगल चव्हाण या ५ फेब्रुवारी रोजी इंडिका कारने रत्नागिरी जिल्ह्यातील खेड तालुक्यातील अंबडस गावी निघाल्या होत्या. त्यांची पहिली मुलगी सारीका आणि नुकतेच जन्मलेले चार दिवसांचे बाळ त्यांच्या सोबत होते.
पहाटे पाच वाजण्याच्या सुमारास त्यांची कार ताम्हिणी घाटात असताना मंगल हिचा पती सचिन गंगाराम चव्हाण व त्याचे भाऊ संजय गंगाराम चव्हाण, नितीन गंगाराम चव्हाण, अजित गंगाराम चव्हाण हे तिथं पोहोचले. त्यांनी जबरदस्तीने इंडिका कार थांबवली आणि मंगलच्या कुशीतील चार दिवसांच्या बाळाला जबरदस्तीने घेतले. त्यानंतर त्याचा गळा आवळून त्याला दरीत टाकून दिले.
या तक्रारीची गंभीर दखल घेऊन पोलीस उपनिरीक्षक जाधव यांच्यासह हवालदार सकपाळ, होळकर व महिला पोलीस शिपाई कोलते हे खासगी वाहनाने अंबडस गावी गेले. सोबत तक्रारदार महिला व तिची मुलगी होती. पोलिसांनी संजय गंगाराम चव्हाण, नितीन गंगाराम चव्हाण, अजित गंगाराम चव्हाण व सचिन गंगाराम चव्हाण यांना ताब्यात घेतले आहे. या प्रकरणी अधिक चौकशी सुरू आहे. बाळाचा टॉवेल सापडला असून बाळाचा शोध सुरू आहे. शिवदुर्ग मित्र ही संस्था आणि एमएमआरसीसीचे कार्यकर्ते सकाळपासून बाळाचा शोध घेत आहेत.
