अमेरिकन काँग्रेसच्या शिष्टमंडळाने घेतली पंतप्रधानांची भेट

दिल्ली -

सिनेटर जॉन कॉर्निन यांच्या नेतृत्वात अमेरिकन काँग्रेसच्या शिष्टमंडळाने आज शनिवारी पंतप्रधान नरेंद्र मोदी यांची भेट घेतली. काँग्रेस सभागृहाच्या शिष्टमंडळात सिनेटर जॉन कॉर्निन, मायकल कॅपो, थॉमस ट्यूबरविले, मायकल ली, टोनी गोंजालेस, जॉन केविन एलीजी (दुसरे ) यांचा सहभाग होता. शिष्टमंडळाने पंतप्रधानांच्या भेटीत कोरोना काळातील मोठे आव्हान आणि अडचणी असतानाही भारताने योग्य नियोजनात्मकरित्या आणि उत्कृष्ट व्यवस्थापन केल्याचा उल्लेख केला.

यावर पंतप्रधान मोदी म्हणाले की, भारतीय लोकांनी मागील शतकात सर्वांत मोठी ठरलेल्या कोरोना महामारीसंबंधी व्यवस्थापनात महत्त्वाची भूमिका निभावली आहे. पंतप्रधानांनी द्विपक्षीय संबंधांमध्ये वाढ करण्याच्या हेतूने आणि दहशतवाद, हवामान बदल यासह विविध मुद्यांवर सहकार्याची भूमिका अधिक मजबूत करण्यासाठी विचारांची आदान-प्रदान केली. याशिवाय पंतप्रधान मोदी यांनी भारत-अमेरिका देशातील व्यापकस्तरावरील जागतिक सहकार्याला अधिक विस्तृत करण्याच्या अमेरिकन काँग्रेसच्या भूमिकेचे स्वागत आणि अभिनंदन केले.