महाराष्ट्राच्या राजकीय पटलावर आरोप-प्रत्यारोपांच्या फटाक्यांचा दणदणाट !

मुंबई -

आज वसुबारस. दिवाळीचा पहिलाच दिवस. मात्र या दिवसापासूनच महाराष्ट्राच्या राजकीय पटलावर आरोप-प्रत्यारोपांच्या फटाक्याचा दणदणाट सुरू झाला आहे. राजकारणातील दिग्गज समजल्या जाणाऱ्या नेत्यांकडून दाव्या-प्रतिदाव्यांचे बॉम्ब फुटू लागल्याने महाराष्ट्रातील यंदाची दिवाळी राजकीय आतिषबाजीमुळे लक्षवेधी ठरणार हे अधोरेखित झाले आहे. सकाळची सुरुवातच राज्याचे अल्पसंख्यांक मंत्री नवाब मलिक यांनी पत्रकार परिषदेने झाली. यामध्ये त्यांनी भाजपचे विरोधी पक्ष नेते आणि माजी मुख्यमंत्री देवेंद्र फडणवीस यांचे ड्रग्ज पेडलर जयदीप राणाबरोबर घनिष्ठ संबंध असून फडणवीसांच्या इशाऱ्यावरुन महाराष्ट्रात ड्रग्जचा खेळ सुरू आहे असा बॉम्ब टाकला.

याआधी, नवाब मलिक यांनी विरोधीपक्ष नेते देवेंद्र फडणवीस यांच्या पत्नी अमृता फडणवीस यांचा फोटो मलिक यांनी ट्वीट केला होता. या फोटोत मिसेस फडणवीस यांच्यासोबत दिसणारी व्यक्ती ही ड्रग पेडलर असल्याचा दावा नवाब मलिक यांनी केला होता. ‘या’ ड्रग्ज पेडलरचं भाजपसोबत कनेक्शन काय?’ असा सवाल राजकीय विश्लेषक निशांत वर्मा यांच्या ट्वीटचा हवाला देत नवाब मलिक यांनी विचारला होता. या पत्रकार परिषदेत मलिक म्हणाले की, जयदीप राणाचा मी फोटो आज ट्विट केला. जयदीप राणा हा सध्या जेलमध्ये बंद आहे. जयदीप राणा 2020 दिल्लीच्या केसमध्ये सध्या जेलमध्ये बंद आहे. ड्रग्ज ट्रॅफिकिंगच्या प्रकरणात त्याला अटक झाली आहे. पण, त्यांचे संबंध महाराष्ट्राचे माजी मुख्यमंत्री देवेंद्र फडणवीस याच्यासोबत आहेत. महाराष्ट्रात जेव्हा ते मुख्यमंत्री होते. तेव्हा त्यांच्या पत्नी अमृता फडणवीस यांनी एक नदी स्वच्छता मोहीमेविषयी गाणं केलं होतं. त्यात सोनू निगम आणि फडणवीसांच्या पत्नी यांनी गाणं गायलं होतं. फडणवीसांनी, सुधीर मुनगंटीवारांनी अभिनय केला होता. त्या गाण्याचे फायनान्स हेड जयदीप राणा होते. देवेंद्र फडणवीस आणि जयदीप राणाचे जवळचे संबंध आहेत, असा दावा नवाब मलिकांनी केला आहे. इतकंच नाही तर गणपतीच्या दर्शनासाठी फडणवीस आणि जयदीप राणा हे एकत्र दिसत असल्याचा फोटो आहे.

मलिकांनी लवंगी फटाका फोडलाय ; मी दिवाळीनंतर बॉम्ब फोडणार - फडणवीस

यानंतर काही वेळातच माजी मुख्यमंत्री देवेंद्र फडणवीस यांनी पत्रकार परिषद घेत नवाब मलिकांनी केलेल्या सर्व आरोपांना प्रत्युत्तर दिले. नवाब मलिक आपण काहीतरी मोठा गौप्यस्फोट केल्याचा आव आणत आहेत. मात्र, त्यांनी दिवाळीपूर्वी लवंगी फटाका फोडलाय. पण मी दिवाळी झाल्यानंतर बॉम्ब फोडणार. नवाब मलिक यांचे अंडरवर्ल्डशी असणारे संबंध मी पुराव्यानिशी समोर आणेन. देवेंद्र फडणवीस हा पुराव्याशिवाय आरोप करत नाही. आजपर्यंत एकदा केलेला आरोप मला कधीही मागे घेण्याची वेळ आलेली नाही. त्यामुळे नवाब मलिकांनी सुरु केलेल्या या खेळाचा शेवट आता मी करणार. मी काचेच्या घरात राहत नाही, असे देवेंद्र फडणवीस यांनी सांगितले.

शिवसेना-भाजप सरकारच्या काळात नीरज गुंडे हा देवेंद्र फडणवीस यांचा दूत म्हणून काम करत होता. पोलिसांच्या बदल्यांपासून ते मंत्रालयातील कामे मार्गी लावण्यात त्याची महत्त्वाची भूमिका होती. एवढेच नव्हे तर शिवसेना आणि भाजपमध्ये तणाव निर्माण झाल्यानंतर नीरज गुंडे मातोश्रीवर निरोप घेऊन जायचा, असा दावा नवाब मलिक यांनी केला होता. मात्र, देवेंद्र फडणवीस यांनी हे सर्व आरोप फेटाळून लावले. उद्धव ठाकरे आणि देवेंद्र फडणवीस यांना कोणाच्याही मांडवलीची गरज पडत नाही. आम्ही मांडवली नव्हे तर चर्चा करतो, असे देवेंद्र यांनी स्पष्ट केले.

लोकांचं लक्ष डायव्हर्ट करण्यासाठी नवाब मलिकांचं नाटक सुरू- किरीट सोमय्या

नवाब मलिक आणि देवेंद्र फडणवीस यांच्या शाब्दिक आतिषबाजीनंतर भाजप नेते किरीट सोमय्या यांनीही लगेच पत्रकार परिषद घेऊन आरोपांचे रॉकेट सोडले. त्यांनी पुन्हा एकदा ठाकरे-पवारांवर टीका केली. अमृता फडणवीसांवर नवाब मलिक यांनी आरोप केले आहेत. एवढ्या खालच्या पातळीवरचे आरोप केवळ ठाकरे-पवारच करू शकतात. ती नवाब मलिकांची कॅपेसिटी नाही, असा दावा किरीट सोमय्या यांनी केला.

सोमय्या पुढे म्हणाले की, उपमुख्यमंत्री अजित पवार यांनी एक हजार कोटींपेक्षा अधिक रक्कम नातेवाईकांच्या खात्यात वर्ग केली आहे. आम्ही तसा आरोप केला होता. मात्र, ईडी आणि आयकर विभागाच्या धाडीतून हे सिद्ध झालं आहे. त्यावरून लक्ष विचलीत करण्यासाठीच समीर वानखेडे आणि अमृता फडणवीस यांच्यावर टीका केली जात आहे. समीर वानखेडे आणि अमृता फडणवीस इतकं गलिच्छ राजकारण केवळ शरद पवार आणि उद्धव ठाकरेच करू शकतात. नवाब मलिकची एवढी कॅपेसिटी नाही, असं सांगतानाच केवळ लक्ष डायव्हर्ट करण्यासाठी हे नाटक सुरू आहे. 19 दिवस ईडीची धाड सुरू आहे हे अजित पवारांनी सांगांवं, असं सोमय्या म्हणाले.

नवाब मलिक गेल्या 12 दिवसांपासून वानखेडेंवर आरोप करत आहेत. वानखेडे यांनी 2006मध्ये लग्न केलं. त्या आधी शेड्यूल कास्ट म्हणून ते नोकरीला लागले. तेव्हा तुमची अक्कल कुठे गेली होती? 2007मध्ये आयएएस, आयआरएस म्हणून ते सिलेक्ट झाले. तेव्हा का गप्प बसला? 2015-16मध्ये त्यांचा घटस्फोट झाला. त्यानंतर तुम्ही का गप्प बसला होता? कधी वानखेडेचं नाव काढायचं तर कधी अमृता फडणवीसांवर टीका करायची, ही काय नौटंकी आहे? का ही पेड पब्लिसीटी? असा हल्ला त्यांनी चढवला. अजित पवारांनी एक हजार 50 कोटीची बेनामी संपत्ती कशी जमवली? पवार कुटुंबांच्या जावयाच्या खात्यात पैसे कुठून आले आणि कसे गेले? याचं उत्तर ठाकरे पवारांना द्यावे लागेल. या सहा फटाक्यांपैकी पहिला फटका मी फोडला आहे. हिंमत असेल तर ठाकरे पवारांनी यावर उत्तर द्यावं, असंही ते म्हणाले.