भोसरी परिसरातून १० लाख रूपये किमतीचा ३१ किलो गांजा जप्त

पिंपरी , (प्रबोधन न्यूज ) - अंमली पदार्थ विरोधी पथकाने दोन वेगवेगळ्या कारवाया करून 10 लाख 64 हजार रुपयांचा 41 किलो गांजा पकडला आहे. याप्रकरणी भोसरी आणि महाळुंगे एमआयडीसी पोलीस ठाण्यात पाच जणांच्या विरोधात गुन्हे दाखल करण्यात आले आहेत.

पहिली कारवाई भोसरी गावठाण येथे करण्यात आली. एका व्यक्तीने गांजा साठवून ठेवला असल्याची माहिती मिळाल्यानंतर पोलिसांनी संजय मोहन शिंदे (वय 36, रा. भोसरी) याला ताब्यात घेतले. त्याच्याकडून सात लाख 81 हजार 300 रुपये किमतीचा 31 किलो 268 ग्राम वजनाचा गांजा जप्त केला आहे. त्याने हा गांजा सुरज झंजाळ याच्याकडून आणला असल्याने त्याच्या विरोधात देखील गुन्हा दाखल करण्यात आला आहे.

दुसरी कारवाई महाळुंगे एमआयडीसी पोलीस ठाण्याच्या हद्दीत वासुली फाटा येथे करण्यात आली. गांजा विक्रीसाठी एकजण येणार असल्याची माहिती मिळाल्याने पोलिसांनी सप्ला लाऊन रवींद्र काशीराम राठोड (वय 38, रा. कडूस, ता. खेड. मूळ. रा. अकोला) याला ताब्यात घेतले. त्याच्याकडून एक दुचाकी, 10 किलो 104 ग्राम वजनाचा गांजा असा एकूण दोन लाख 82 हजार 600 रुपयांचा मुद्देमाल जप्त केला. त्याने हा गांजा विकास बाले आणि पठारे (पूर्ण नाव माहिती नाही) यांच्याकडून आणला असल्याने त्यांच्या विरोधात देखील गुन्हा दाखल करण्यात आला आहे.

दोन्ही कारवायांमध्ये अंमली पदार्थ विरोधी पथकाने दोघांना अटक केली. त्यांच्याकडून 10 लाख 64 हजार 300 रुपये किमतीचा 41 किलो 372 ग्राम गांजा जप्त केला आहे.

ही कामगिरी पोलीस आयुक्त विनयकुमार चौबे, सह पोलीस आयुक्त डॉ. संजय शिंदे, अप्पर पोलीस आयुक्त वसंत परदेशी, पोलीस उप आयुक्त स्वप्ना गोरे, सहाय्यक पोलीस आयुक्त बाळासाहेब कोपनर यांच्या मार्गदर्शनाखाली वरिष्ठ पोलीस निरीक्षक सतिश पवार, सहायक पोलीस निरीक्षक प्रशांत महाले, उपनिरीक्षक ज्ञानेश्वर दळवी, राजन महाडीक, पोलीस अंमलदार प्रदिप शेलार, दिनकर भुजबळ, संतोष दिघे, संदीप पाटील, मनोज राठोड, मयूर वाडकर, संतोष भालेराव, विजय दौडकर, प्रसाद कलाटे, दादा घस, प्रसाद जंगिलवाड, रणधीर माने, मितेश यादव, सदानंद रुद्राक्षे, अशोक गारगोटे, कपिलेश इगवे, पांडुरंग फुंदे यांनी केली आहे.