मूल होण्यासाठी सासरच्यांनी घेतली तांत्रिकाची मदत; पतीला अटक, बाबा फरार

वडगाव-मावळ (प्रबोधन न्यूज) - तंत्रज्ञानाने कितीही प्रगती केली असली तरी आजही लोक अवैज्ञानिक आणि सनातनी परंपरा आणि चालीरीतींच्या जाळ्यात अडकले आहेत, असे वेळोवळी दिसून येत आहे. जे खरोखर विचार करायला लावणारे आहे. पुण्याजवळील वडगाव-मावळ परिसरातील एका खेडेगावात सुनेला मूल होत नाही म्हणून एका तांत्रिकाची मदत घेण्यात आली. सुनेने याची माहेरी कल्पना दिल्यानंतर पोलिसांत गुन्हा दाखल करण्यात येऊन तिच्या पतीला अटक करण्यात आली आहे तर अघोरी पूजा करणारा बाबा फरार झाला आहे.

मिळालेल्या माहितीनुसार एका महिलेला मूल होत नसल्याने पती आणि सासूने तिचा छळ केला आणि उपचारासाठी तांत्रिकाची मदत घेतली. हताश झालेल्या ३३ वर्षीय महिलेने आपली व्यथा तिच्या पालकांसोबत सांगून वडगाव मावळ पोलीस ठाण्यात तक्रार दाखल केली. या नंतर पोलिसांनी तातडीने दखल घेऊन तिच्या 36 वर्षीय पतीला अटक केली असून, 55 वर्षीय सासूविरुद्ध जादूटोणा विरोधी कायद्यांतर्गत गुन्हा दाखल केला आहे. लग्नानंतर पीडितेचा पती आणि सासूने तिचा मानसिक आणि शारीरिक छळ वारंवार करीत होते.

महिलेने पोलिसांना सांगितले की, तिच्या पतीने तिला मारहाण केली आणि दोन दिवस शौचालयात कोंडून ठेवले. सुरुवातीला महिलेने ही बाब तिच्या वडिलांना सांगितली नाही, त्यामुळे तिचा पती त्याचा फायदा घेऊन तिला सतत त्रास देत असे. एवढेच नाही तर पतीने तिला कधीही घराबाहेर पडू दिले नाही आणि कोणाशीही बोलू दिले नाही. गर्भधारणा होत नसल्याने तिच्या पतीने तिला तांत्रिकाने दिलेले लिंबाचा रस बळजबरीने पाजला. लग्नातही वराने हुंड्यात आलिशान कारची मागणी केली होती. प्रत्येक भांडणानंतर नवरा तिला बेदम मारहाण करायचा, त्यामुळे तिने शेवटी आई-वडिलांना आपल्याला होत असलेला त्रास सांगितला.

या प्रकरणाचा तपास करत असलेले पोलीस निरीक्षक विलास भोसले यांनी सांगितले की, पोलिसांनी पीडितेच्या पतीला अटक केली असून तांत्रिकाचा शोध सुरू केला आहे. महाराष्ट्र प्रिव्हेंशन अँड इरेडिकेशन ऑफ ह्युमन सॅक्रिफाइस अँड अदर अमानवी, वाईट आणि अघोरी प्रथा आणि काळी जादू कायदा, 2013 अंतर्गत गुन्हा दाखल करण्यात आला आहे. पुढील तपास सुरू आहे.