बसच्या धडकेत दुचाकीस्वाराचा मृत्यू

पिंपरी , (प्रबोधन न्यूज ) - दुचाकीला बसने समोरून धडक दिली. या अपघातात दुचाकीवरील तरुणाचा मृत्यू झाला. ही घटना शनिवारी (दि. 26) सायंकाळी पावणे सात वाजता वाय जंक्शन चौक, पिंपळे निलख येथे घडली.

अभिजित संजय किरवे (वय 29, रा. गोखलेनगर, पुणे) असे मृत्यू झालेल्या दुचाकीस्वार तरुणाचे नाव आहे. याप्रकरणी पोलीस अंमलदार रोहित पालके यांनी सांगवी पोलीस ठाण्यात फिर्याद दिली आहे. त्यानुसार चंद्रकांत गुरप्पा विटकर (वय 44, रा. लोहगाव, पुणे. मूळ रा. कर्नाटक) याच्या विरोधात गुन्हा दाखल करण्यात आला आहे.

पोलिसांनी दिलेल्या माहितीनुसार, अभिजित किरवे हे त्यांच्या दुचाकीवरून रक्षक चौकातून वाय जंक्शन चौकाच्या दिशेने जात होते. त्यावेळी आरोपीने त्याच्या ताब्यातील बस हयगयीने चालवून अभिजित यांच्या दुचाकीला समोरून धडक दिली. त्यात अभिजित हे गंभीर जखमी झाले. त्यातच त्यांचा मृत्यू झाला. सांगवी पोलीस तपास करीत आहेत.