प्लॅस्टिकमुक्‍त शहरासाठी घरापासून सुरुवात करा - उपायुक्‍त संदीप खोत

चिखली संतपीठात पर्यावरणदिन साजरा

चिखली (प्रबोधन न्यूज) - प्लॅस्टिकमुक्त शहर करण्यासाठी नागरिकांचा सहभाग मोलाचा आहे. आपले घर, परिसर प्लॅस्टिकमुक्त करून याची सुरूवात करावी असे आवाहन महानगरपालिकेचे उपायुक्त तथा संतपीठाचे संचालक संदीप खोत यांनी केले.

पिंपरी चिंचवड महानगरपालिका संचलित टाळगाव चिखली येथील जगद्‌गुरू संत तुकाराम महाराज संतपीठ स्कूल ऍन्ड ज्युनिअर कॉलेजमध्ये जागतिक पर्यावरण दिनाचे औचित्य साधून स्वच्छ भारत अभियान अंतर्गत स्वच्छता मोहीम राबविण्यात आली. या कार्यक्रमासाठी प्रमुख पाहुणे म्हणून संचालक संदीप खोत मार्गदर्शन करताना बोलत होते. यावेळी संतपिठाच्या संचालिका डॉ. स्वाती मुळे, संचालक हभप राजूमहाराज ढोरे, प्राचार्या मृदुला महाजन, स्कूलमधील शिक्षक, शिक्षकेतर कर्मचारी आदी मान्यवर उपस्थित होते. स्वच्छता मोहिमेत सर्वांनी सक्रीय सहभाग नोंदवला. प्राचार्या महाजन यांच्या मार्गदर्शनाखाली झालेल्या कार्यक्रमात राजूमहाराज ढोरे यांनी पाहुण्यांचे स्वागत केले. डॉ. स्वाती मुळे यांनी आभार मानले.