लोणावळ्यातील जंगलात बेपत्ता झालेल्या तरुणाचा अखेर हाती लागला मृतदेह

लोणावळा, दि. 24 मे - काही दिवसांपूर्वी दिल्लीचा एक इंजिनियर तरुण लोणावळा येथे फिरण्यासाठी आणि ट्रेकिंगसाठी आला होता. परंतु अचानक तो बेपत्ता झाला. बेपत्ता झालेल्या तरुणाचा 4 दिवसांनी मृतदेह आढळून आला. फरहान अहमद असे या तरुणाचे नाव असून तो 20 मे रोजी बेपत्ता झाला होता.

बेपत्ता फरहान याचा शोध घेण्यासाठी स्थानिक पोलीस आणि रेस्क्यू टीमने प्रयत्न केले परंतु तो सापडला नाही. आज (मंगळवार) फरहानचा मृतदेह सापडला आहे. यापूर्वी तरुण बेपत्ता झाल्यानंतर त्याच्या आई-वडिलांनी एक पत्रक काढत नागरिकांना मुलाला शोधून देण्याचे आवाहन केले होते. शोधून देणाऱ्यास एक लाख रुपयांचे बक्षीसही जाहीर केले होते.

दरम्यान, तरुणाने बेपत्ता होण्यापूर्वी आपल्या भावाला संपर्क करुन ट्रेकिंगच्या जागेची माहिती दिली होती. परंतु त्यानंतर त्याचा फोन बंद झाला आणि तो बेपत्ता झाला. आज त्याचा मृतदेह मिळाला आहे. आयएनएसच्या (INS) लोकांना बॉडी मिळाली आहे. एनडीआरएफ सुद्धा घटनास्थळी पोहोचले असून बेपत्ता तरुणाचे शोधकार्य संपल्याचे सांगण्यात आले आहे.