आयसीएमआरने सांगितले, ओमिक्रॉनवर 'ही' लस अधिक प्रभावी !

नवी दिल्ली -

ओमिक्रॉन व्हेरिएंट या नवीन व्हेरिएंटने कोरोनाव्हायरस विरुद्धच्या युद्धादरम्यान जगभरात चिंता वाढवली आहे. ओमिक्रॉन व्हेरियंटने भारतातही दार ठोठावले आहे. कर्नाटकमध्ये दोन प्रकरणे समोर आल्याने, संपर्कात आलेल्या पाच लोकांना संसर्ग झाल्याचे आढळून आले आहे, त्यानंतर सर्व राज्ये अलर्ट मोडवर आली आहेत. केंद्र आणि राज्य सरकारे आपापल्या स्तरावर आवश्यक ती पावले उचलत आहेत. लॉकडाऊनसारखी परिस्थिती आतापर्यंत निर्माण झाली नसली तरी निर्बंधांबाबत मंथन सुरू आहे. लसीकरण हे कोरोनासोबतच्या युद्धातील सर्वात मोठे शस्त्र मानले जात आहे. इंडियन काउंसिलिंग ऑफ मेडिकल रिसर्च अर्थात आयसीएमआरनुसार (ICMR) स्वदेशी लस म्हणजेच कोवॅक्सीन या प्रकाराचा सामना करण्यासाठी अधिक प्रभावी सिद्ध होऊ शकते.

मीडिया रिपोर्ट्सनुसार, एका अधिकाऱ्याने सांगितले की, कोवॅक्सीनचा डोस सध्याच्या उर्वरित लसीपेक्षा अधिक प्रभावी असू शकतो. भारत बायोटेकची लस ही निष्क्रिय व्हायरसच्या तंत्रज्ञानावर बनवण्यात आलेली लस आहे. ही लस संपूर्ण विषाणू निष्क्रिय करते आणि नवीन प्रकारांवर देखील प्रभावी ठरू शकते. याआधीही कोरोना विषाणूच्या अल्फा, बीटा, गामा आणि डेल्टा यांसारख्या प्रकारांवर कोवॅक्सीन प्रभावी ठरली आहे.

ओमिक्रॉन व्हेरियंटच्या आगमनानंतर, त्याला रोखण्यासाठी देशभरात प्रयत्न सुरू झाले आहेत. त्याचवेळी कोरोनाची लस बनवणाऱ्या कंपन्या आता सरकारकडे बूस्टर डोसची मागणी करत आहेत. अलीकडे, पुण्यातील सीरम इन्स्टिट्यूट ऑफ इंडियाने DCGI कडे कोविशील्डचे बूस्टर डोस देण्यासाठी परवानगी मागितली आहे. असे मानले जाते की याओमिक्रोनपासून संरक्षण करण्यासाठी बूस्टर डोस लागू करणे आवश्यक आहे. मात्र, सरकार वारंवार बैठका घेऊन यावर विचार करत आहे.

दरम्यान, बचावासाठी काही निर्बंध लागू करण्यात आले आहेत. आंतरराष्‍ट्रीय उड्डाणांवर सध्या बंदी घालण्‍यात आली आहे. याशिवाय चाचणी आणि लसीकरण वाढवण्याच्या सूचनाही देण्यात आल्या आहेत. राज्य सरकारे RT-PCR चाचणीवर भर देत आहेत. त्याचबरोबर परदेशातून येणाऱ्या प्रवाशांवरही बारीक नजर ठेवण्याच्या सूचना देण्यात आल्या आहेत.