मुंबईतील भाजप आमदाराने अमरावती दंगलीसाठी पैसे पुरवले - नवाब मलिक यांचा खळबळजनक आरोप

मुंबई-

भाजपचे नेते अनिल बोंडे यांनीच दंगलीचा कट रचला होता. दंगल भडकवण्यासाठी मुंबईतून पैसे आले होते. भाजपच्या एका आमदाराने हे पैसे वाटले होते, असा गंभीर आणि खळबळजनक आरोप अल्पसंख्यांक विकास मंत्री नवाब मलिक यांनी केला आहे. त्यामुळे एकच खळबळ उडाली आहे. नवाब मलिक यांनी पत्रकार परिषद घेऊन संवाद साधला. त्यावेळी ते बोलत होते.

भाजपने बंदच्या आडून पद्धतशीरपणे दंगली भडकवण्याचे काम केले. पोलिसांनी हा कट उधळून लावला. राज्यात दंगल भडकवण्याचे भाजपचे षडयंत्र होते. राज्यातील जनतेने संयम राखला. त्यामुळे राज्यात इतर ठिकाणी दंगली भडकल्या नाही. अमरावती सोडून कुठेच काही घडलं नाही.

अमरावतीत कोणत्याही दोन समुदायात दंगल झाली नाही. भाजपचे नेते अनिल बोंडे यांनी 2 तारखेच्या रात्री दंगलीचे षडयंत्र रचले. दारु वाटल्या गेली, पैसे वाटण्यात आले. दंगली भडकावल्या गेल्या. पोलीस चौकशीत माहिती मिळाली आहे. मुंबईतून दंगली भडकवण्यासाठी पैसे गेले. आमदाराच्या माध्यमातून या पैशाचं वाटप करण्यात आलं. त्याचीही चौकशी सुरू आहे, असा गंभीर आरोप मलिक यांनी केला. सर्व अस्त्र संपल्यानंतर भाजप दंगलीचं राजकारण करत असते. भाजपचे लोक जाणकार आहेत. त्यामुळे ते काहीही करू शकतात, असंही मलिक म्हणाले.