विद्यार्थी उज्ज्वल भविष्य घडवू शकतात - संजय आवटे

संदीप वाघेरे युवा मंचकडून गुणवत विद्यार्थ्यांचा सन्मान

पिंपरी, (प्रबोधन न्यूज ) - शैक्षणिक क्षेत्रात मुलांविषयी पालकांची स्वप्न असणं गैर नाही. परंतु, आपले विचार त्यांच्यावर लादणे चुकीचे आहे. त्यांचा कल ओळखून प्रोत्साहन दिल्यास ते अधिक चांगल्या पद्धतीने आपले भविष्य घडवू शकतात, असे प्रतिपादन संपादक संजय अवटे यांनी केले.

पिंपरीत संदीप वाघेरे युवामंचच्या वतीने इयत्ता दहावी व बारावीच्या गुणवंत विद्यार्थ्यांचा सत्कार करण्यात आला. या कार्यक्रमात अवटे बोलत होते. यावेळी मार्गदर्शक यशदाचे डॉ. बबन जोगदंड यांच्यासह दत्तोबा नाणेकर, पवना बॅंकेचे संचालक शिवाजी वाघेरे, रामदास कुदळे, किसन कापसे, विजय जाचक, संदीप कापसे, शेखर अहिरराव आदी उपस्थित होते. इयत्ता 10 वीतील गुणवंत विद्यार्थिनी काव्या बाणेकर हिला लॅपटॉप, लुथ्रा ध्रुव व कांबळे आरजू यांना टॅब, सान्वी गव्हाणे, सांची निकाळजे यांना स्कूल बॅग भेट देण्यात आल्या. इयत्ता 12 वीच्या मुलवानी वंशिका हिला लॅपटॉप, यादव भूमिका व माळी तनिशा यांना टॅब देण्यात आला. ज्युनिअर केजी ते इयत्ता 8 वीच्या सुमारे 759 गरीब गरजू विद्यार्थ्यांना मोफत शालेय साहित्य वाटप केले.

अवटे म्हणाले, आई-वडिलांचे मुलांशी मैत्रीपूर्ण नाते असावे. आकाशाला गवसनी घालण्याचं सामर्थ्य मुलांनी ठेवायला हवं. स्वप्न पाहिले नाही, तर ध्येय आणि उद्दिष्टापर्यंत पोहोचू शकणार नाही. यशस्वी होऊ शकणार नाही. तसेच, आपल्या पालकांची असणारी स्वप्ने त्यांच्या अपेक्षा याही पूर्ण करण्याचा प्रयत्न मुलांनी करायला हवा.

कार्यक्रमाचे सूत्रसंचालन अनिल कातळे यांनी केले. तसेच, कार्यक्रमाचे आयोजन संदीप वाघेरे युवा मंचचे अध्यक्ष हरीश वाघेरे, सदस्य गणेश मंजाळ, सचिन वाघेरे, रंजना जाधव, पवन हिरवे, मयूर बोडगे, समीर वाघेरे, अपूर्वा खोचाडे, शितल पोतदार, दिपा काळे यांनी केले.