पश्‍चिम महाराष्ट्रातील इच्छुकांसाठी वधू-वर परिचय मेळावा

पिंपरी - पुणे, सातारा, सांगली, कोल्हापूर, सोलापूर आणि अहमदनगर येथील असंख्य नागरिक नोकरी व्यवसायाच्या निमित्ताने पुणे व पिंपरी-चिंचवड येथे वास्तव्यास असल्याने या सर्व नागरिकांकरिता (सातारा जिल्हा) पश्‍चिम महाराष्ट्र वधू-वर सूचक केंद्राच्या वतीने सामाजिक बांधिलकी या संकल्पनेतून सर्व जातीच्या वधू-वर मेळाव्याचे नाममात्र सवलत (फी) आकारून करण्यात आले आहे.

पिंपरी चिंचवड येथे जुन्या पुणे-मुंबई महामार्गावरील (आकुर्डी) खंडोबा देवस्थानच्या सांस्कृतिक भवन येथे दिनांक 02 एप्रिल रोजी सकाळी दहा ते दुपारी तीन या वेळेत हा मेळावा होणार आहे. या मेळाव्यात सहभागी होण्याकरिता 1 एप्रिलपर्यंत नाव नोंदणी करण्याची सुविधा उपलब्ध करुन देण्यात आली आहे. निगडी प्राधिकरणातील स्व. यशवंतराव चव्हाण स्मृती भवन येथील पश्‍चिम महाराष्ट्र वधू-वर सूचक केंद्रात सकाळी साडे दहा ते दुपारी दीड आणि सायंकाळी साडे चार ते साडे सात या वेळेत नाव नोंदणी करता येणार आहे.

या मेळाव्याकरिता सातारा जिल्हा मित्र मंडळ, सोलापूर जिल्हा मित्र मंडळ, साकोसां ज्येष्ठ नागरिक संघ, कोल्हापूर जिल्हा युवा मंच, अहमदनगर जिल्हा मित्र मंडळ, साकोसां महिला मंडळ, सांगली जिल्हा मित्र मंडळ, पश्‍चिम महाराष्ट्र युवा मंच आणि बारामती सोशल ऍण्ड वेल्फेअर फाऊंडेशनचे सहकार्य लाभत आहे. पश्‍चिम महाराष्ट्रातील इच्छूक वधू-वरांनी या मेळाव्यात सहभागी व्हावे, असे आवाहन आयोजकांच्या वतीने करण्यात आले आहे.

तरी इच्छुक वधू-वरांनी याचा लाभ घ्यावा असे आवाहन संयोजक, पश्चिम महाराष्ट्र वधू-वर सूचक केंद्र पिंपरी चिंचवड पुणे यांच्या वतीने करण्यात आले आहे.