आत्महत्येतून वाचली पण बलात्कार वाट्याला आला; रुग्णवाहिकेत झाला बलात्कार

केरळ (प्रबोधन वृत्तसेवा) - केरळमधून एक लाजीरवाणी घटना समोर आली आहे. आत्महत्येचा प्रयत्न करणाऱ्या महिलेला उपचारासाठी रुग्णालयात नेण्यात येत होते. दरम्यान, एका वॉर्ड बॉयने रुग्णवाहिकेत तिच्यावर बलात्कार केला. महिलेला त्रिशूर मेडिकल हॉस्पिटलमध्ये हलवण्यासाठी नेत असताना ही घटना घडली. पोलिसांनी ही माहिती दिली आहे.

पोलिसांनी सांगितले की, या प्रकरणी कोडुंगल्लूर तालुका रुग्णालयातील कर्मचारी के. दयालाल याला आरोपी म्हणून अटक करण्यात आली आहे. मेडिकल कॉलेज हॉस्पिटलमध्ये पोहोचल्यानंतर पीडितेने तिच्यावर ओढवलेला प्रसंग डॉक्टरांना सांगितला. यानंतर पोलिसांनी गुन्हा दाखल करून आरोपीला अटक केली.

महिलेने विष प्राशन करून आत्महत्येचा प्रयत्न केला होता, मात्र नातेवाइकांच्या लक्षात येताच तिला कोडुंगल्लूर रुग्णालयात दाखल करण्यात आले. येथे त्यांच्या तब्येतीत सुधारणा न झाल्याने त्यांना त्रिशूर मेडिकल कॉलेजमध्ये दाखल करण्यात आले. कोडुंगल्लूर रुग्णालयातून वैद्यकीय महाविद्यालयात स्थलांतरित होत असताना रुग्णालयातील कर्मचारी दयालाल यांना रुग्णवाहिकेत सोबत येण्यास सांगण्यात आले.

दरम्यान, दयालालने रुग्णवाहिकेत महिलेवर बलात्कार केला. पीडितेने सुरुवातीला नर्सला हा प्रकार सांगितला आणि नंतर डॉक्टरांनाही माहिती दिली. यानंतर रुग्णालयातच पोलिसांना पाचारण करण्यात आले.

यानंतर हे कृत्य करून पळून जाण्याच्या प्रयत्नात असलेल्या आरोपीला पोलिसांनी ताब्यात घेतले. याप्रकरणी आरोग्यमंत्री वीणा जॉर्ज यांनी रुग्णालयाच्या अधीक्षकांकडून अहवाल मागवला आहे. अटकेसोबतच आरोपी दयालालला तत्काळ प्रभावाने नोकरीवरून काढून टाकण्यात आले आहे. तो करारावर काम करत होता.

अशीच एक घटना दोन वर्षांपूर्वी कोट्टायम येथे घडली होती. एका रुग्णवाहिका चालकाने कोरोनाग्रस्त मुलीवर बलात्कार केला. त्यानंतर महिला रुग्णांना एकट्याला रुग्णवाहिकेतून रुग्णालयात नेता येणार नाही, असा आदेश सरकारने काढला होता. त्यांच्यासोबत एक आरोग्य कर्मचारीही असेल. आरोपींनी यापूर्वीही अशा काही घटना घडवून आणल्याचा पोलिसांचा संशय असून, त्याचा तपास सुरू आहे.