दाऊद टोळीविरोधात मुंबई गुन्हे शाखेची मोठी कारवाई; ५ जणांच्या मुसक्या आवळल्या

मुंबई, (प्रबोधन न्यूज) - अंडरवर्ल्ड डॉन दाऊद इब्राहिम टोळीविरोधात मुंबई गुन्हे शाखेने मोठी कारवाई केली आहे. याप्रकरणी 5 जणांना अटक केली आहे. खंडणी प्रकरणात ही कारवाई करण्यात आल्याचे सांगितले जात आहे. दाऊदचा जवळचा साथीदार गँगस्टर छोटा शकील आणि रियाज भाटीला अटक केल्यानंतर ही कारवाई करण्यात आली आहे.

मुंबई गुन्हे शाखेने अजय गंडा, फिरोज लेदर, समीर खान, पापा पठाण आणि अमजद रेडकर या आरोपींना अटक केली आहे. पोलिसांनी यापूर्वी गँगस्टर छोटा शकील आणि मेहुणा सलीम कुरेशी उर्फ सलीम फ्रूट आणि रियाझ भाटीला खंडणी प्रकरणात अटक करण्यात आली आहे.

अंधेरी वर्सोवा येथील एका व्यावसायिकाला धमकावून त्याच्याकडून 30 लाखांची कार आणि 7.5 लाख रुपयांची रोकड लुटल्याचा पोलिसांचा आरोप आहे. आरोपींच्या चौकशीदरम्यान महत्त्वाची माहिती समोर येणार असल्याचे पोलिसांचा अंदाज आहे.

या पाचही जणांना आज न्यायालयासमोर हजर केले जाणार असून तेथे त्यांची पोलीस कोठडी मागितली जाणार आहे. मुंबईतील बांधकाम व्यावसायिकांकडून पैसे उकळणारे डी कंपनी संबंधित आरोपी पोलिसांच्या रडारवर होते. या प्रकरणी आणखी काही लोकांना अटक होण्याची शक्यता आहे.