उद्या शिंदे सरकारचा मंत्रिमंडळ विस्तार होणार ? ‘यांची’ वर्णी लागण्याची शक्यता

नवी दिल्ली, (प्रबोधन न्यूज) - महाराष्ट्रात एकनाथ शिंदे आणि देवेंद्र फडणवीस यांचे सरकार स्थापन होऊन एक महिना उलटून गेला, तरीही मंत्रिमंडळ विस्तार झालेला नाही. त्यामुळे विरोधकांकडून शिंदे-फडणवीस सरकारवर जोरदार टीका केली जात आहे. दरम्यान, सूत्रांकडून मिळालेल्या माहितीनुसार, राज्य मंत्रिमंडळाचा विस्तार उद्या ५ ऑगस्ट रोजी होणार आहे. महाराष्ट्राच्या या नव्या सरकारच्या 15 संभाव्य मंत्र्यांची यादीही समोर आली आहे. मात्र, या दोन्ही गोष्टींना अद्याप कोणीही दुजोरा दिलेला नाही.

सूत्रांकडून मिळालेल्या माहितीनुसार, एकनाथ शिंदे आणि देवेंद्र फडणवीस यांच्या सरकारमध्ये एकूण 12 मंत्र्यांना पद आणि गोपनीयतेची शपथ दिली जाऊ शकते. त्यापैकी सात भाजपचे तर पाच शिंदे कॅम्पचे असतील. भाजपचे प्रदेशाध्यक्ष चंद्रकांत पाटील, सुधीर मुनगंटीवार यांच्या नावाचाही प्रमुख चेहऱ्यांमध्ये समावेश आहे. त्याचबरोबर शिंदे गटातील गुलाबराव पाटील आणि दादा भुसे यांचाही यादीत समावेश करण्यात आला आहे.

बंडखोर आमदारांचे समाधान करण्याचे मोठे आव्हान एकनाथ शिंदे यांच्यासमोर आहे. सूत्रांकडून मिळालेल्या माहितीनुसार दादा भुसे, उदय सामंत, दीपक केसरकर, शंभूराज देसाई, संदीपान भुमरे, संजय शिरसाठे आणि गुलाबराव पाटील यांना मंत्री करण्याची तयारी सुरू आहे.

भाजपकडून चंद्रकांत पाटील, सुधीर मुनगंटीवार, गिरीश महाजन, प्रवीण दरेकर, आर. के. विखे पाटील, रवी चव्हाण, बबनराव लोणीकर आणि नितेश राणे शपथ घेऊ शकतात. याशिवाय बच्चू कडू आणि रवी राणा या अपक्षांपैकी एकाला मंत्री केले जाऊ शकते.

मंत्रिमंडळ विस्ताराच्या दिरंगाईबद्दल विरोधकांकडून राज्य सरकारवर जोरदार टीका होत आहे. दरम्यान, शिंदे कॅम्पचे प्रवक्ते दीपक केसरकर यांनी मंत्रिमंडळ विस्ताराबाबत महत्त्वाचे वक्तव्य केले आहे. येत्या रविवारपर्यंत राज्यात मंत्रिमंडळाचा विस्तार होईल, असा त्यांचा दावा आहे. एवढेच नाही तर मुख्यमंत्री एकनाथ शिंदे याबाबत अधिकृत घोषणा करणार असल्याचेही केसरकर यांनी सांगितले.

दरम्यान, शिंदे गट विरुद्ध शिवसेना वादावर सर्वोच्च न्यायालयात आज सुनावणी झाली. न्यायालयाने शिंदे गट, शिवसेना आणि निवडणूक आयोगाचं म्हणणं ऐकून घेतलं. या प्रकरणावरील पुढील सुनावणी ८ ऑगस्ट रोजी होणार आहे. मात्र, निवडणूक आयोगात असलेल्या प्रकरणात शिवसेनेला दिलासा मिळाला आहे.