…म्हणून सदाभाऊंच्या xxला आग लागली असावी; अमोल मिटकरींची जीभ घसरली

नागपूर, दि. 29 मार्च - भाजपाचे नेते आणि रयत क्रांती संघटनेचे अध्यक्ष सदाभाऊ खोत यांनी राष्ट्रवादी काँग्रेसचे अध्यक्ष शरद पवार यांच्यावर टीका केली होती. त्यानंतर राष्ट्रवादीचे आमदार अमोल मिटकरी यांनी सदाभाऊ खोत यांच्या टीकेवर पलटवार केला आहे. सदाभाऊंना आमदारकी टिकवायची आहे, म्हणून ते पवारसाहेबांवर अशी टीका करत आहेत, म्हणून सदाभाऊंच्या xxला आग लागली वाटले, अशी टीका अमोल मिटकरी यांनी केली आहे.

अमोल मिटकरी हे नागपूर जिल्ह्याच्या दौऱ्यावर आले होते. यावेळी काही उद्घाटनाचे कार्यक्रम पार पडले. त्या वेळी बोलताना त्यांनी भाजपावर जोरदार हल्लाबोल केला. “सदाभाऊ खोत यांची आमदारकीची टर्म संपलेली आहे आणि महाविकास आघाडीच्या कामामुळे ते अस्वस्थ झाले आहेत. त्यांना पुन्हा आमदारकी पाहिजे. यामुळे कदाचित सदाभाऊच्या xxला आग लागली असावी, असे ते म्हणाले.

आदरणीय शरद पवारांबाबत बोलताना आपण एवढ्या महान सूर्यासमोर बोलतोय हे लक्षात ठेवावे. थुंकण्याचा प्रयत्न केला तर थुंकी आपल्या तोंडावर उडते इतके ज्ञान सदाभाऊंना असावे. सदाभाऊंना पुढची आमदारकी टिकवायची आहे. सदाभाऊ किंवा त्यांचा मित्र हे स्वतः बोलत नाहीत. यांचे मास्टरमाइंड देवेंद्र फडणवीस आहेत. आग लावण्याचे काम भाजपा करते, असे माझे स्पष्ट मत आहे. भाजपापासून महाराष्ट्राला धोका आहे. खोत यांच्या बोलण्याकडे भाजपामधलेही कोणी लक्ष देत नाही, अशी प्रतिक्रिया अमोल मिटकरी यांनी दिली आहे.