नवीन वर्षापासून एटीएम वापरणे परवडणार नाही ? कसे, जाणून घ्या !

नवी दिल्ली -

नवीन वर्षापासून म्हणजेच 1 जानेवारी 2022 पासून एटीएम वापरणे महाग होणार आहे. आता दरमहा दिलेल्या विहित मर्यादेपेक्षा जास्त एटीएम व्यवहार केल्यास जास्त पैसे मोजावे लागतील. RBI ने सर्व बँकांना 1 जानेवारी 2022 पासून ATM व्यवहारांसाठी शुल्क वाढवण्याची परवानगी दिली आहे. आता, तुम्ही तुमच्या एटीएममध्ये दिलेल्या मोफत व्यवहारांच्या संख्येपेक्षा जास्त वापरल्यास, तुम्हाला पूर्वीपेक्षा जास्त पैसे बँकेला द्यावे लागतील.

रिझर्व्ह बँकेच्या सूचनेनुसार, मोफत व्यवहारांची मासिक मर्यादा संपल्यानंतर आता बँक ग्राहकांना अधिक पैसे मोजावे लागणार आहेत. सध्या 20 रुपये प्रति व्यवहार दराने शुल्क आकारले जाते. एक जानेवारी 2022 पासून, हे प्रति व्यवहार 21 रुपये होईल. हे आर्थिक आणि गैर-आर्थिक दोन्ही व्यवहारांसाठी लागू असेल.

रिझर्व्ह बँकेने असेही स्पष्टपणे सांगितले आहे की जर कोणताही कर लागू असेल तर तो या शुल्कापासून वेगळा असेल, म्हणजेच आतापर्यंत 20 रुपयांच्या शुल्क व्यतिरिक्त कर आकारला जात होता. आता 21 रुपये शुल्क आणि लागू कर आकारला जाईल.

बँक ग्राहकांना त्यांच्या बँकेच्या एटीएममधून दर महिन्याला पाच व्यवहार मोफत करण्याची परवानगी आहे. इतर बँकांसह विनामूल्य व्यवहारांची मर्यादा तुम्ही ज्या शहरात राहत आहात त्यावर अवलंबून असते. मेट्रो शहरांमध्ये राहणारे बँक ग्राहक इतर बँकेच्या एटीएममधून दर महिन्याला तीन मोफत व्यवहार करू शकतात. इतर शहरांतील ग्राहकही इतर बँकेच्या एटीएममधून दर महिन्याला पाच मोफत व्यवहार करू शकतात.