हवालदार ते सहायक पोलीस उपनिरीक्षकपदी नंतर पुन्हा हवालदारपदी

सातारा (प्रबोधन वृत्तसेवा) – नोकरीत एकदा बढती मिळाल्यानंतर त्या व्यक्तीची पुन्हा मूळ जागेवर नेमणूक झाल्याचे तुम्ही कधी ऐकलंय. पण असं घडलंय, तेही सातारा पोलीस खात्यात. मिळालेल्या माहितीनुसार विजय शिर्के या हवालदाराला बढती मिळून सहायक पोलीस उपनिरीक्षकपदी नेमणूक झाली होती. परंतु एका लाच प्रकरणात सापडल्याने त्याची दोन वर्षांसाठी पुन्हा हवालदारपदी नेमणूक झाली आहे. या घटनेमुळे सातारा पोलीस दलात खळबळ उडाली आहे.

साताऱ्यातील उद्योजक राजेंद्र चोरगे यांच्या गुरुकुल शाळेच्या मालकी हक्कावरून 4 वर्षांपूर्वी वाद झाला होता. यातून राजेंद्र चोरगे यांच्याविरुद्ध गुन्हा दाखल झाल्यानंतर अटक टाळण्यासाठी आणि केसमध्ये मदत करण्यासाठी सहायक पोलीस उपनिरीक्षक विजय शिर्के यांनी पैसे मागितले होते. या सर्व बाबी तक्रारदार राजेंद्र चोरगे यांनी रेकॉर्डिंग केले. हे सर्व पुरावे पोलीस अधीक्षकांकडे सादर केले आणि गुन्हा दाखल करण्याची मागणी राजेंद्र चोरगे यांनी केली होती.

याप्रकरणी पोलीस खात्याअंतर्गत चौकशी झाल्यानंतर सहायक पोलीस उपनिरीक्षक शिर्के यांची पदावनती करण्यात आली आहे. एकूण 12 लाखांची मागणी करण्यात आली होती. त्यापैकी 6 लाख घेतल्याचे विजय शिर्केने रेकॉर्डिंगमध्ये कबूल केलं आहे.