खडकवासला धरणात उडी घेत तरुणाची आत्महत्या

पुणे,(प्रबोधन न्यूज) - पुण्यातील 31 वर्षीय तरुणाने खडकवासला धरणात उडी घेऊन आयुष्य संपवलं.चंद्रशेखर गोपाळ पुजारी असे या तरुणाचे नाव आहे. 'माझी गाडी (बाईक) खडकवासला धरणाजवळ लावली आहे. मी आत्महत्या करत आहे. आईची काळजी घ्या. गाडी विकून येणारे पैसे माझ्या आईला द्या', असा व्हॉइस मेसेज चुलत भावाला पाठवून चंद्रशेखर याने आत्महत्या केली.

चंद्रशेखर गोपाळ पुजारी या तरुणाने पानशेत रस्त्याला लागून खडकवासला धरणाच्या भिंतीजवळ पाण्यात उडी घेऊन आत्महत्या केली. तो पुण्यातील सोमवार पेठ भागातील रहिवासी होता. शुक्रवारी सकाळी दहा वाजण्याच्या सुमारास त्याचा मृतदेह पाण्यावर तरंगताना आढळल्यामुळे एकच खळबळ उडाली होती.

आत्महत्येपूर्वी चुलतभावाला व्हॉईस मेसेज
चंद्रशेखर गुरुवारी पहाटे पाच वाजण्याच्या सुमारास खडकवासला धरणाजवळ गेला होता. तिथून त्याने आपल्या चुलत भावाला व्हॉइस मेसेज पाठवला होता. ‘माझी गाडी खडकवासला धरणाजवळ लावली आहे. मी आत्महत्या करत आहे. माझ्या आईची काळजी घ्या. गाडी विकून जे पैसे येतील, ते माझ्या आईला द्या’ असा तो मेसेज होता. चुलत भाऊ आणि चंद्रशेखरच्या इतर नातेवाईकांनी तातडीने खडकवासला येथे धाव घेतली. तेव्हा धरण परिसरात त्याची दुचाकी पार्क केलेली सापडली. त्यामुळे नातेवाईकांनी फरासखाना पोलीस ठाण्याच्या गाडीतळ चौकीत चंद्रशेखर हरवल्याची तक्रार दाखल केली. दुसऱ्या दिवशी (शुक्रवारी) सकाळी दहा वाजण्याच्या सुमारास खडकवासला धरणाच्या भिंतीजवळ रस्त्याला लागून एक मृतदेह पाण्यावर तरंगत असल्याची माहिती स्थानिकांनी हवेली पोलिसांना दिली. पोलिसांनी घटनास्थळी जाऊन मृतदेह पाण्याबाहेर काढला. तपासणीसाठी मृतदेह ससून रुग्णालयात पाठवला होता. फरासखाना पोलीस या प्रकरणी पुढील तपास करत आहेत.