पुण्यात 'ते आले, त्यांनी पाहिलं, ते लढले आणि पडले !' कार्यकर्त्यांच्या धक्काबुक्कीत किरीट सोमय्या महापालिकेच्या पायरीवर पडले

पुणे -

आपल्या तडाखेबंद शब्दांनी विरोधकांवर नेहमी तुटून पडणाऱ्या 'त्यांना' आज संतप्त सैनिकांच्या धक्काबुक्कीचा 'सामना' करावा लागला आणि पुणेकरांना 'ते आले, त्यांनी पाहिलं, ते लढले आणि पडले !' चा प्रत्यय आज (शनिवारी) आला. पुणे महापालिकेत शिवसेना आणि भाजपा कार्यकर्ते आमनेसामने आलेले पाहायला मिळाले. शिवसैनिकांनी केलेल्या धक्काबुक्कीत भाजपा नेते किरीट सोमय्या अक्षरशः पायरीवर पडले होते. या तुफान राड्यानंतर पोलिसांनी प्रसंगावधान राखत किरीट सोमय्यांना जमावातून बाहेर काढत गाडीत बसवले.

किरीट सोमय्या शिवाजीनगर पोलीस स्टेशनमध्ये दाखल झाले होते. त्यानंतर ते महापालिकेमध्ये आले असताना शिवसेना कार्यकर्ते आक्रमक झाले आणि त्यांनी सोमय्यांना धक्काबुक्की केली. यावेळी पोलिसांनी किरीट सोमय्यांना घटनास्थळावरून बाहेर काढण्याचा प्रयत्न केला. मात्र, शिवसैनिकांच्या धक्काबुक्कीत किरीट सोमय्या पायऱ्यांवर पडले. यानंतर पोलिसांनी सोमय्या यांना तिथून बाजूला नेत गाडीत बसवले. पोलिसांनी किरीट सोमय्या यांना गाडीत बसवल्यानंतरही आक्रमक शिवसैनिकांनी सोमय्यांच्या गाडीवरही हल्ला चढवला. काही कार्यकर्ते गाडीच्या समोर आले, तर काही कार्यकर्त्यांनी गाडीच्या मागच्या बाजूने हल्ला केला.

सोमय्या आधी शिवाजीनगर पोलीस स्टेशनमध्ये गेले. तिथे त्यांनी पुणे जम्बो कोविड सेंटरमध्ये घोटाळा झाल्याचा आरोप करत तक्रार केली. तिथून पालिकेत आयुक्तांना भेटण्यासाठी ते आले असताना शिवसेना कार्यकर्त्यांनी धक्काबुक्की केली आणि सगळा प्रकार घडला.

हल्ल्यानंतर सोमय्यांनी केले ट्विट
शिवसैनिकांच्या हल्ल्यानंतर किरीट सोमय्या यांनी स्वतः याची माहिती देत ट्वीट केलंय. ते म्हणाले, 'माझ्यावर शिवसेनेच्या गुंडांनी पुणे महानगरपालिकेच्या आवारात हल्ला केला आहे.' दरम्यान, किरीट सोमय्या या हल्ल्यानंतर संचिती हॉस्पिटलला दाखल झालेत. या ठिकाणी त्यांची वैद्यकीय तपासणी होणार आहे.

त्यांच्याच रक्षकांमुळे सोमय्या पडले - संजय मोरे ( शिवसेना शहर प्रमुख)

शिवसैनिकांनी किरीट सोमय्यांवर हल्ला केल्याचे वृत्त धादांत खोटे असल्याचे सांगत शिवसेनेचे शहरप्रमुख संजय मोरे यांनी आपली बाजू मंडळी. ते म्हणाले की, महापालिकेतील भ्रष्टाचार बाहेर काढण्यासाठी आम्ही आलो होतो. त्यांचे निवेदन देण्यासाठी आम्ही आलो होते. काही कार्यकर्ते समोर गेल्यावर. त्यांनी निवेदन घेण्यास नकार दिला. त्यानंतर पोलीस व पदाधिकाऱ्यांनी धक्काबुक्की केल्यामुळे शिवसैनिक आक्रमक झाले. तेव्हा पोलिसांनी तसेच सोमय्यांच्या सुरक्षारक्षकांनी किरीट सोमय्यांना मागे ओढले. त्यात ते पडले. पोलिसांनी या वेळी सोमय्या यांनी दिलेल्या आदेशावर लाठीमार केला. त्यामुळे गोंधळ झाला. त्यानंतर पुढच्या गेट समोर मी स्वतः शहर प्रमुख म्हणून त्यांची गाडी अडविली आणि निवेदन देण्याचा प्रयत्न केला. मात्र, माझ्या अंगावर गाडी घातली. मी खाली पडलो. आम्ही त्यांना कोणतीही धक्का बुक्की केलेली नाही. आम्ही केवळ निवेदन देत होतो. सोमय्या हे शिवसैनिकांमुळे पडले नाहीत.

किरीट सोमय्या घाबरणाऱ्यांमधले नाहीत - चंद्रकांत पाटील
भाजपाचे प्रदेशाध्यक्ष चंद्रकांत पाटील म्हणाले की, मुद्दे संपले की माणसं गुद्यावर येतात. पायाखालची वाळू घसरली की सभ्यतेचा बुरखा फाटून मूळ चेहरा समोर येतो. किरीट सोमय्या घाबरणाऱ्यांमधले नाहीत. त्यांचा प्रकरणे काढण्याचा इतिहास आहे. अनेकांना त्यांनी घरी पाठवलं आहे.