अयोध्येत लता दीदी चौकात 40 फूट उंचीची वीणा उभारली

अयोध्या (प्रबोधन वृत्तसेवा) - उत्तर प्रदेशातील अयोध्येतील शरयू नदीच्या काठावर असलेल्या नयाघाट चौक आता 'लता मंगेशकर' चौक म्हणून ओळखला जाणार आहे. गानसम्राज्ञी लता मंगेशकर असे नाव देण्यात आलेल्या स्मृती चौकाचे बुधवारी मुख्यमंत्री योगी यांनी लोकार्पण केले आहे. या कार्यक्रमास केंद्रीय सांस्कृतिक मंत्री जी किशन रेड्डी, लतादीदी यांचे पुतणे आदिनाथ मंगेशकर आणि लतादीदींच्या सूनबाई यांची उपस्थिती होती.

या चौकाची आणखी एक खास गोष्ट आहे. वास्तविक लता मंगेशकर यांनी आपल्या ९२ वर्षांच्या आयुष्यात अनेक गाणी आणि भजने गायली आहेत. ते दाखवण्यासाठी चौकाच्या मधोमध 92 कमलदल लावण्यात आले असून, ते भाविकांच्या आकर्षणाचे केंद्र बनले आहे.

हे स्मारक पर्यटक आणि संगीतप्रेमींसाठी आकर्षणाचे प्रमुख केंद्र ठरणार आहे. हे देशातील पहिलेच ठिकाण असेल, जिथे शहराला अजरामर सुरेल आवाज जोडण्यासाठी एवढे मोठे वाद्य बसवण्यात आले आहे. या प्रकल्पाची किंमत 7.9 कोटी रुपये आहे आणि तो जगातील उत्कृष्ट नमुना म्हणून चिन्हांकित करण्याचा प्रयत्न करण्यात आला आहे.

गुजरातमधील 'स्टॅच्यू ऑफ युनिटी'चे शिल्पकार पद्मश्री पुरस्कारप्राप्त राम सुतार यांनी वीणा साकारली आहे. वीणामध्ये माँ सरस्वतीचे, कमळाच्या फुलाचे चित्र कोरले आहे. हे काम दोन महिन्यांत पूर्ण झाले.

उद्यानाच्या दुसऱ्या बाजूला लता मंगेशकर चौकात अत्याधुनिक ध्वनी यंत्रणा बसवण्यात आली आहे. जिथे लता मंगेशकर यांनी गायलेली राम धुन २४ तास भक्तांच्या अमर मधुर स्वरात ऐकायला मिळेल. हे स्मारक पर्यटक आणि संगीत प्रेमींसाठी प्रमुख आकर्षणाचे केंद्र बनण्यासाठी त्यात अत्याधुनिक विद्युत रोषणाई करण्यात आली आहे, जेणेकरून रामभक्त आणि लतादीदींच्या आवाजाच्या चाहत्यांना प्रकाश आणि शोचा आनंद घेता येईल.

त्याचबरोबर या कार्यक्रमासाठी पंतप्रधान नरेंद्र मोदी यांनी व्हिडिओद्वारे संदेश दिला. मोदी म्हणाले की, लता दीदी मॉ सरस्वतीच्या साधिका होत्या. त्यांच्या आवाजाने संपूर्ण जग जोडले गेले. राम मंदिराच्या उभारणीने लतादीदी खूश झाल्या होत्या.

गानसम्राज्ञी लता मंगेशकर यांची आज 93 वी जयंती आहे. चौकाचे उद्घाटन करण्यापूर्वी लतादीदींना अभिवादन करण्यात आले. यानंतर लतादीदींचे पुतणे आदिनाथ मंगेशकर आणि सून कृष्णा मंगेशकर यांनी स्वागत केले. लतादीदींनी गायलेली भजने महाराष्ट्रातील गायिका सावनी रवींद्र यांनी सादर केले.

केंद्रीय गृहमंत्री अमित शहा यांनी ट्विट करून लिहिले - साधेपणा आणि सौम्यतेचे प्रतीक असलेल्या लता मंगेशकरजी यांनी भारतीय संगीताला जागतिक पातळीवर नेले आहे, त्यांच्या योगदानाने संगीत उद्योग समृद्ध झाला आहे. त्यांचा मधुर आवाज सर्वांच्या हृदयाला भिडतो. संगीत आणि देशभक्तीला समर्पित त्यांचे जीवन आपल्यासाठी प्रेरणादायी आहे.

मुख्यमंत्री योगी आदित्यनाथ याप्रसंगी बोलताना म्हणाले की, लतादीदी यांच्या दिवसाची सुरूवात श्रीरामाच्या पूजेने होते असे. हा चौक असणे म्हणजे जागतिक विक्रमच आहे. लतादीदींच्या नावाने विद्यापीठही उघडण्याचा मानस त्यांनी व्यक्त केला. अयोध्येचा विकास झपाट्याने होत असून यातून विशेष म्हणजे पर्यटन आणि आध्यात्मिक दृष्टीने विकास होऊ लागलेला आहे, असे ही सीएम योगी यांनी सांगितले. केंद्रीय मंत्री जी किशन रेड्डी म्हणाले की- 5 वर्षांत यूपी पर्यटनाच्या क्षेत्रात नवीन उंची गाठणार आहे.