दोन महिन्यानी उलगडले तरूणाच्या मृत्यूचे गुढ; तीन मित्रांना केले अटक

पिंपरी , (प्रबोधन न्यूज ) - पाचव्या मजल्यावरून पडून तरुणाचा मृत्यू झाला होता. मात्र पोलिसांच्या दोन महिन्याच्या तपासात ती आत्महत्या नसून त्याला उडी मारण्यास त्याच्याच मित्रांनी भाग पाडल्याचे समोर आले. हा प्रकार 21 मे 2023 रोजी तुपे वस्ती मोशी येथे घडला. याप्रकरणी तिघांना अटक करण्यात आली आहे.

सागर दत्तात्रय गाढवे (वय 29, रा. चिखली), सुहास गयाभाऊ गाढवे (वय 23, रा. चिखली) व मंगेश जालींदर वाळुंज (वय 26 रा. चिखली) अशी अटक केलेल्यांची नावे आहेत. मिथिलेश लंगोटे असे मयत तरुणाचे नाव आहे.

पोलिसांनी दिलेल्या माहितीनुसार, मिथिलेश हा तुपे वस्ती येथील कॉसमॉस सोसायटीच्या पाचव्या मजल्यावरून पडल्याने त्याचा मृत्यू झाला असे समजून पोलिसांनी पोलीस ठाण्यात अकस्मात मृत्यूची नेंद केली. मात्र काही संशयात्मक बाबींचा तपास करत असताना धक्कादायक सत्य समोर आले. ज्यामध्ये मिथिलेश हा आरोपी सोबत कॉसमॉस सोसायटीच्या फ्लॅटमध्ये दारू पीत बसला होता. यावेळी त्यांच्यात भांडण झाले व भांडणाचे रुपांतर मारामारीत झाले. यावेळी मारामारीपासून वाचण्यासाठी मिथिलेश तेथून पळून जाण्याचा प्रयत्न करत होता. मात्र आरोपींनी त्याला जाऊ दिले नाही. यावेळी मिथिलेश फ्लॅटच्या गॅलरीत गेला. तेथून त्याने शेजारच्या फ्लॅटच्या गॅलरीत उडी मारण्याचा प्रयत्न केला. यात तो थेट पाचव्या मजल्यावरून खाली पडला व त्याचा मृत्यू झाला. एमआयडीसी भोसरी पोलीस तपास करीत आहेत.